Á Grenihlíð eru að jafnaði 25 börn á aldrinum fjögurra til sex ára.

Verkefnavinna

Í verkefnavinnu er börnunum skipt eftir aldri í minni hópa. Börnin læra að vinna saman að verkefnum og taka tillit hvert til annars. Vinnustund hópsins hefst og lýkur á sama hátt. Í gegnum veturinn er viðfangsefni eða þema tekin fyrir og rannsakað ítarlega út frá áhuga barnanna.

Í verkefnavinnu vinnum við með vísindaleiki. Með orðinu vísindaleikir er átt við námsathafnir sem frá sjónarhóli barnsins eru leikur en eru frá sjónarhóli leikskólakennara einnig tilraunir og athuganir á sviði náttúrufræða, til að mynda eðlisfræði og stjörnufræði.

Markmið vísindaleikja er að börnin læri náttúruvísindi jafnframt því sem slíkir leikurinn stuðlar að almennum þroska.

Samverustund

Markmiðið er að njóta þess að vera saman í stórum hóp og skemmta sér saman. Börnin læra að þau þurfa að hlusta á aðra og taka tillit til annara (bæði börn og fullorðna), læra söngva, þulur og ýmsa leiki. Þau læra jafnframt að koma fram og að tjá sig í stórum hóp bæði með efni sem þau hafa lært en einnig efni sem þau sjálf hafa skapað.

Útivera

Í útiveru er markmiðið að örva hreyfiþroska barnanna og líkamlegt úthald, kenna þeim ýmislegt um náttúruna og að njóta hennar. Auk þess læra þau ýmsa hópleiki (t.d. stórfiskaleik).

Verkefni elstu barna

Elstu börnunum er boðið upp á ýmis verkefni þar sem m.a. er unnið með orð og hugtök tengd móðurmáli og stærðfræði og grunnir lagður að þekkingu og þekkingaröflun fyrir næsta skólastig.

Stig af stigi

Á deildinni er unnið með stig af stigi sem er kennsluefni fyrir börn á aldrinum 4-10 ára og er námsefni sem áfram er unnið með í sumum grunnskólum. Markmiðið með stig af stigi er að þjálfa börn í félagsfærni. Efla samskipta hæfni og samræður um líðan og upplifun.

Lubbi

Á deildinni er unnið með Lubbi finnur málbein sem er námsefni fyrir börn og er ætlað að kenna íslensk málhljóð þar sem táknrænar hreyfingar eru notaðar fyrir hvert málhljóð sem gerir það sýnilegt og áþreifanlegt fyrir barnið.

Listaskálinn

Einu sinni í viku fara börnin í listaskálann til Dýrleifar þar sem unnið er með ólík efni og að ólíkum verkefnum sem oft á tíðum tengjast þeim verkefnum sem unnin eru inn á deildum.