Á Holti eru að jafnaði 15 börn og á aldrinum eins til tveggja ára þegar þau hefja skólagöngu sína.

Að læra að leika

Mikil áhersla er lögð á námsumhverfi barnanna, það er að aðgangur að leikföngum sé auðveldur fyrir börnin, að þau geti gengið í þau sjálf því það þroskar snemma með þeim hæfni og kunnáttu til að velja það sem þau hafa áhuga á og leggur grunnin að því að leika við aðra.

Verkefnavinna

Í verkefnavinnu er börnunum skipt eftir aldri í minni hópa. Þar sem skipulagt starf er unnið í hópum og ber þar að nefna vísindaleikinn, í útiveru eða málörvun.

Listsköpun sem tungumál

Mikið er lagt upp úr tjáningu í ólíkum formum eins og teikningu, með leir eða öðrum efnislegum hlutum eða í gegnum gjörðir, enda mörgum börnum á þessum aldri ekki tamt að koma hlutunum frá sér í orðum og geta því ólík form orðið sterkur tjáningar máti fyrir barnið.

Þjónar og veðurfræðingar

Í hverri viku er barn þjónn vikunnar og veðurfræðingur. Það aðstoðar að leggja á borð og koma matnum á borðið auk þess sem það fær tækifæri til að tjá sig um veðrið og hvernig það er úti þá stundina og rætt um það hvernig þurfi að klæða sig.

Samverustund

Markmiðið er að njóta þess að vera saman í hóp og skemmta sér saman. Börnin læra að þau þurfa að hlusta á aðra og taka tillit til annara (bæði börn og fullorðna), læra söngva, þulur og ýmsa leiki. Söngurinn er mikilvægur þáttur í þroska barna þar sem þau eiga oft auðvelt með að læra textana, hreyfingarnar og laglínurnar þar sem þetta er oft endurtekið og er þetta vinsæl stund hjá mörgum börnum.

Útivera

Í útiveru er markmiðið að örva hreyfiþroska barnanna og líkamlegt úthald og ýta undir almennt heilbrigði barna. Á sama tíma læra þau á náttúruna og að njóta hennar auk þess sem rúm er fyrir aðra tegund af leikjum þar sem jafnvel ólíkir einstaklingar leika sér saman.

Nánari upplýsingar um starf um yngri deildanna má finna í skýrslunni „Skína smástjörnur“